Eń aldymen óńir basshysy jylyjaı ósirýdi 25 sottyqtan bastaǵan jeke kásipker Rahymjan Kenjebaevtiń sharýashylyǵynda bolyp, jylyjaıdy aralap kórdi. Ondaǵy jumys barysymen tanystyrǵan kásiporyn tóraǵasy 2,5 gektar bolatyn jylyjaı kólemin kúz aıynda 5 gektarǵa deıin ulǵaıtatynyn aıtty. Elimizdi jyl on eki aı kókónispen qamtamasyz etý kóktemi erte keletin eginshilikke aýa-raıy qolaıly - Ońtústiń enshisinde ekenin aıtqan ákim sharýashylyq ıesiniń bul josparyn qoldap qýattady. Sondaı-aq, ol memleketten tıisti kómek pen qoldaý kórsetiletinin atap ótti.
Aıta keteıik, ótken jyly jylyjaıdan 50 tonna qyzanaq, 25 tonna qııar jınalǵan bolsa, búgingi kúnge 2 ga jerge egilgen qyzanaqtan 85 tonna ónim jınaldy. Al memleketten alǵan sýbsıdııa kólemi 2,6 mln teńgeni quraıdy.
Munan soń, aımaq basshysy jańa tehnologııany endirip, 600 gektar jerdi jańbyrlatý ádisimen sýǵaryp otyrǵan «Jańa Aqdala» Agrofırmasy» JShS-niń egistik alqabymen tanysty. Jańa tehnologııany tanystyrǵan seriktestik basshysy bul ádis arqyly sharýalar aǵyn sýdy únemdep qana qoımaı, ónim kólemin de arttyrýǵa bolatynyn jetkizdi.
Aqdala aýyldyq okrýginde ornalasqan seriktestik bıyl ózine qarasty egistik jerlerdi ıgerý úshin Germanııanyń BOUER kompanııasynan shyqqan jańbyrlatyp sýǵarý ádisin qoldanyp otyr. Onyń árqaısysy bir orynda 60 gektar jerdi sýǵarýǵa múmkindigi bar. Sharýashylyq quny 67 myń eýro turatyn qurylǵynyń 7 danasyn alyp, iske qosqan. Jańbyrlatyp sýarý ádisiniń tıimdiligi óte kóp. Máselen, úlken jerlerdi sýǵarýǵa tıimdi, ekinshiden sý únemdelip, jumys kúshi kóp qajet etilmeıdi. Úshinshiden bir mezgilde sýǵarylyp, tegis mol ónim alýǵa múmkindik týady eken.
Jumys sapary barysynda oblys ákimi táýligine 120 tonna un shyǵaratyn jeke kásipker B.Sarbasovtyń un dıirmeninde boldy. Seriktestik ıesi óndiristiń kólemin arttyrý maqsatynda qosymsha qarjy kózderi arqyly jańa dıirmen ornatqanyn aıtyp, nátıjesinde ónim kólemin eki esege arttyrǵanyn jetkizdi.
Kásipker janyndaǵy naýbaıhanada kúndigine 3 myń dana bólke nan shyǵaryp, qasyndaǵy naýbaıhana dúkeninde qaladaǵy eń arzan nandy satady.
Sapar sońynda oblys ákimi J.Túımebaev Arys qalasynyń basshysyna keıbir sheshimin kútken máselelerge nazar aýdaryp, onyń sheshý joldaryn qarastyrýdy jáne turǵyndardyń áleýmettik jaǵdaıyn jaqsartý baǵytyndaǵy jumystardy jandandyrýdy aıtty.